ЕКАТЕРИНБУРГ, 4 сентябрь. /"Дунё" АА/. Ўзбекистон бош консули Жахонгир Парманов Урал савдо-саноат палатаси президенти Андрей Беседин билан учрашди, деб хабар қилмоқда "Дунё" АА мухбири.

Унда Ўзбекистон ҳудудлари ва Свердловск вилояти ўртасида савдо-иқтисодий алоқаларни янада кенгайтириш масалалари муҳокама қилинди.

Бош консул Ўзбекистон ва Россия ўртасидаги савдо-иқтисодий ва саноат йўналишларидаги ҳамкорликнинг ҳолати ва истиқболлари ҳақида сўзлаб берди.

Ўзбекистон ва Россия ҳудудлараро ҳамкорлигини қўллаб-қувватлаш мақсадида Екатеринбург шаҳри ва мамлакатимиз вилоятларидаги йирик тадбиркорлар иштирокида бизнес-форум ва улар ўртасида B2B шаклидаги учрашувларни сентябрь ойида ўтказиш имкониятлари кўриб чиқилди.

Бўлажак бизнес-форумга республикамизда ишлаб чиқариш, хизмат кўрсатиш ва бошқа соҳаларда фаолият кўрсатаётган йирик тадбиркорлар таклиф қилинади ҳамда ўзбек миллий маҳсулотларининг кўргазмаси ташкил этилади.