АНҚАРА, 29 январь. /“Дунё” АА/. Ўзбекистон Президенти Шавкат Мирзиёевнинг Анқарага расмий ташрифи арафасида Туркия оммавий ахборот воситалари икки томонлама муносабатларнинг долзарб жиҳатларини кенг ёритиб, бўлажак олий даражадаги саммит ҳақида ёзмоқда, деб хабар бермоқда “Дунё” АА мухбири.

Хусусан, “Sabah”, “Ahaber”, “TV100”, “Turkgün”, “M Star, “Independent Türkçe”, “Takvim”, “Haber Turk”, “Milliyet”, “Aksam”, “TRT Avaz”, “TRT Haber”, “CNN Turk”, “Bengü Türk”, “Haber Global”, “Yeni Şafak” каби нуфузли ОАВда бу борада туркум материаллар эълон қилинди.

Материалларда қайд этилишича, ташриф доирасида Анқара шаҳрида икки давлат раҳбарлари раислигида Туркия–Ўзбекистон Стратегик ҳамкорлик кенгашининг тўртинчи йиғилиши бўлиб ўтади.

“Учрашувда Туркия ва Ўзбекистон ўртасидаги икки томонлама ҳамкорликни янада чуқурлаштириш бўйича қадамлар батафсил муҳокама қилинади, – дейилади мақолаларда. – Бу йўналишда икки мамлакат ўртасидаги муносабатларнинг ҳуқуқий ва шартномавий асосига салмоқли ҳисса қўшадиган қатор ҳужжатлар имзоланиши кутилмоқда”.

Савдо ҳажмининг ўсиши, мудофаа саноати, энергетика ва транспорт йўлаклари каби муҳим мавзулардан ташқари, музокаралар чоғида минтақавий хавфсизлик масалалари ҳам муҳокама қилиниши кутилмоқда.

Учрашувлар чоғида минтақавий ва халқаро воқеалар юзасидан атрофлича фикр алмашилиши кутилмоқда. Ташрифнинг энг муҳим манзилларидан бири Ўзбекистон томонидан мамлакат ташқарисида очилган биринчи мактабга тамал тоши қўйиш маросими бўлади.