ВАРШАВА, 5 ноябрь. /“Дунё” АА/. Польшанинг “Kierunek Kaukaz” ахборот-таҳлилий порталида “Дональд Трамп Ўзбекистонга ташриф буюришни режалаштиряптими?” сарлавҳали мақола эълон қилинди, деб хабар бермоқда “Дунё” АА мухбири.

АҚШнинг глобал ҳамкорлик бўйича махсус вакили Паоло Замполлининг яқинда Тошкентга ташрифи чоғида телевидениега берган интервьюсида Ўзбекистон Дональд Трамп сафар қилишни режалаштираётган мамлакатлар рўйхатига киритилгани ҳақидаги фикрлари ушбу мақоланинг ёзилишига туртки бўлди.

“Биламан, у Ўзбекистонга келишни хоҳлайди. Президент менга Ўзбекистонга бориш ниятида эканини айтди. Умид қиламизки, бу ташриф имкон қадар тезроқ амалга ошади. Бироқ Президентнинг иш жадвали жуда тиғиз бўлгани сабабли ташрифнинг аниқ санаси ҳозирча маълум эмас”, ­– дея таъкидлади Паоло Замполли.

Америкалик дипломатнинг баҳолашича, президентлар Шавкат Мирзиёев ва Дональд Трамп ўртасидаги мулоқот даражаси алоҳида аҳамиятга эга.

Нашрнинг ёзишича, Президент Шавкат Мирзиёев Америка етакчисини бир неча бор мамлакатга таклиф қилган. АҚШ маъмурияти сўнгги пайтларда минтақанинг энг муҳим фойдали қазилмаларидан фойдаланиш имкониятига устувор аҳамият қаратган ҳолда Марказий Осиё давлатлари билан муносабатларни мустаҳкамлаб келмоқда.

Порталда АҚШ Ўзбекистоннинг минтақавий авиация хабига айланиш борасидаги саъй-ҳаракатларини қўллаб-қувватлаётганини алоҳида қайд этилган.

Тошкент халқаро аэропорти 2026 йилнинг дастлабки олти ойида 5,4 миллион йўловчига хизмат кўрсатди, бу ўтган йилнинг шу даврига нисбатан 17 фоизга кўпдир. Шунингдек, бу борада Самарқанд, Бухоро ва Термизда ҳам ўсиш кузатилган.

Мақолада “Boeing” компаниясининг Марказий Осиёни энг муҳим ўсиб бораётган бозорлардан бири сифатида эътироф этган прогнози келтирилган. 2025 йилда Ўзбекистон узоқ масофага учувчи 22 та “Boeing 777 Dreamliner” самолётини харид қилиш мажбуриятини олган.