АНҚАРА, 1 сентябрь. /“Дунё” АА/. Анқара инқироз ва сиёсатни ўрганиш маркази (АНКАСАМ) раиси, профессор Меҳмет Сайфеттин Эрол Ҳиндистон Бош вазири Нарендра Модининг 29–30 август кунлари Ўзбекистонга амалга оширган давлат ташрифи якунларини “Дунё” АА учун шарҳлади:

— Нарендра Модининг Тошкентга давлат ташрифи Ҳиндистон ва Ўзбекистон ўртасидаги муносабатлар анъанавий сиёсий мулоқот доирасидан сезиларли даражада ташқарига чиққан бир пайтга тўғри келди.

Бугунги кунда икки мамлакат ўртасида нафақат ўзаро англашув, балки аниқ иқтисодий кун тартиби - фармацевтика ва соғлиқни сақлашдан тортиб, энергетика, кимё саноати, геология, қишлоқ хўжалиги ва машинасозликкача бўлган соҳаларда ҳамкорлик қилиш учун салмоқли умумий манфаатлар шаклланди.

Гап айнан тизимли ҳамкорлик ҳақида кетаётгани алоҳида эътиборга молик. Ҳиндистон учун Ўзбекистон Марказий Осиёдаги энг барқарор ва очиқ ҳамкорлардан бири сифатида қизиқиш уйғотади. Тошкент учун эса Ҳиндистон ўзаро муносабатларни ривожлантириш улкан салоҳиятга эга бўлган йирик давлатдир.

Бугунги ўзбек дипломатиясининг кучли томонларидан бири ҳам айнан шунда. Тошкент ўз ҳамкорларини бир-бирига қарама-қарши қўймайди, балки жиддий мулоқот олиб боришга тайёр бўлганлар сафини изчил кенгайтириб бормоқда. Ҳиндистон бу ерда Хитой, Туркия, Европа ва Форс кўрфази мамлакатлари ҳамда Ўзбекистоннинг бошқа ҳамкорлари қаторидан муносиб ўрин эгаллайди.

Мен учун яна бир муҳим жиҳат шундаки, Ҳиндистон Ўзбекистонга кимнингдир ўрнини эгаллаш учун келаётгани йўқ. У ўз манфаатлари ва аниқ таклифлари билан кирмоқда, Тошкент эса ушбу таклифларни бошқа ҳамкорлар тақдим этаётган имкониятлар билан солиштириш имкониятига эга бўлмоқда.

Айнан шу боис Ўзбекистон ва Ҳиндистоннинг яқинлашувини Туркиядан кузатиш ғоят мароқлидир. Ишончли шерикларнинг кенг сафига эга бўлган кучли Тошкент Ўзбекистон билан узоқ муддатли муносабатлар ўрнатишга самимий умид боғлаган ҳар бир томон учун манфаатлидир.