ВЕНА, 14 март. /“Дунё” АА/. Ўзбекистон Президенти Администрацияси ҳузуридаги Наркотиклар ва ўқотар қуролларни назорат қилиш агентлиги директори ўринбосари Жобир Азимов бошчилигидаги делегация 9-12 март кунлари Венада бўлиб ўтган БМТнинг Наркотик моддалар бўйича комиссиясининг 69-сессиясида иштирок этди, деб хабар бермоқда “Дунё” АА мухбири.

Сессия доирасида Ўзбекистон вакиллари комиссиянинг ялпи мажлисларида сўзга чиқиб, халқаро наркосиёсатни амалга ошириш, гиёҳванд моддаларнинг ноқонуний айланишига қарши курашда глобал ҳамкорликни мустаҳкамлаш ва синтетик гиёҳванд моддалар тарқалиши билан боғлиқ янги таҳдидларга қарши курашиш масалаларини муҳокама қилдилар.

Ўзбекистон делегацияси гиёҳвандликнинг олдини олиш, гиёҳвандларни даволаш ва реабилитация қилиш, шунингдек, гиёҳванд моддаларнинг ноқонуний айланишига қарши курашиш соҳасидаги мамлакат тажрибасини тақдим этиб, халқаро наркология сиёсатининг долзарб масалаларини муҳокама қилишга фаол ҳисса қўшди.

10-март куни Ўзбекистон делегацияси томонидан БМТнинг Гиёҳванд моддалар ва жиноятчилик бўйича бошқармаси билан ҳамкорликда “Гиёҳванд моддаларнинг ноқонуний айланишига қарши курашда халқаро ҳамкорлик: Ўзбекистондаги самарали лойиҳалар ва шериклик намуналари” мавзусида халқаро қўшимча тадбир (сайд-ивент) ташкил этилди.

Тадбирда халқаро ташкилотлар вакиллари, экспертлар ва БМТга аъзо давлатлар вакиллари иштирок этди. Муҳокама чоғида Ўзбекистон ва Марказий Осиё минтақасида БМТнинг Наркотиклар ва жиноятчилик бўйича бошқармаси (UNODC) лойиҳаларини амалга оширишнинг амалий мисоллари тақдим этилди, шунингдек, трансмиллий наркожиноятчиликка қарши курашда халқаро шерикликни мустаҳкамлаш муҳимлиги таъкидланди.

Учрашув якунида томонлар хавфсизлик ва барқарорликни таъминлаш учун Марказий Осиёда минтақавий ҳамкорликнинг аҳамияти тўғрисида якдил фикр билдирдилар.