ЛАКНАУ, 21 март. /«Дунё» АА/. Ўзбекистон делегацияси Ҳиндистоннинг Лакнау шаҳридаги Қишлоқ ҳудудларини ривожлантириш банк институтида (Bankers Institute of Rural Development - BIRD) бўлиб ўтган хотин-қизлар етакчилигини ривожлантиришга бағишланган халқаро дастурда фаол иштирок этди, деб хабар бермоқда «Дунё» АА мухбири.

Тадбир хотин-қизларнинг ҳуқуқ ва имкониятларини кенгайтириш ҳамда гендер сиёсатининг самарали механизмларини жорий этиш соҳасида тажриба алмашиш учун турли мамлакатлар вакилларини бирлаштирди.

Ўзбекистон делегацияси аъзолари дастур доирасида мамлакатимиз Президенти раҳнамолигида жамият ҳаётида хотин-қизларнинг ролини ошириш борасида амалга оширилаётган изчил чора-тадбирларга бағишланган кенг қамровли тақдимот ўтказди.

Гендер тенгликни таъминлаш, хотин-қизларнинг ижтимоий-сиёсий ва иқтисодий соҳаларда ўз салоҳиятини рўёбга чиқариши учун қулай шарт-шароитлар ва кенг имкониятлар яратишга қаратилган тизимли ишларга алоҳида эътибор қаратилди.

Ўзбекистоннинг хотин-қизлар ўзлигини намоён этиши учун қулай муҳит яратиш борасидаги тажрибаси хорижий экспертлар ва дастур иштирокчиларида жонли қизиқиш уйғотди. Экспертлар Ўзбекистон ривожланиш моделининг изчиллиги ва натижадорлигини алоҳида қайд этди.

Делегация ташрифи Ўзбекистон ва Ҳиндистон ўртасида мустаҳкамланиб бораётган стратегик шерикликнинг яна бир тасдиғи бўлди. Сўнгги йилларда икки мамлакат ўртасидаги ҳамкорлик сифат жиҳатидан янги босқичга кўтарилди. Хотин-қизлар етакчилигини қўллаб-қувватлаш соҳасидаги ўзаро ҳамкорлик истиқболли йўналишлардан бири сифатида эътироф этилди.

Ўзбекистон делегациясининг ушбу дастурдаги иштироки мамлакатимизнинг барқарор ривожланиш мақсадлари ва инклюзивлик тамойилларига содиқлигининг яна бир исботи бўлди. Зеро хотин-қизлар учун тенг имкониятлар яратиш давлат сиёсатининг устувор йўналишларидан бири сифатида қаралади.

Bankers Institute of Rural Development Ҳиндистоннинг қишлоқ ҳудудларини барқарор ривожлантириш, молиявий инклюзивлик ва фуқароларнинг ижтимоий-иқтисодий ҳуқуқларини кенгайтириш, жумладан, аёллар етакчилиги бўйича дастурларга ихтисослашган етакчи институтидир.