ТОШКЕНТ, 3 март. /“Дунё” АА/. 2026 йил 16-19 июнь кунлари Тошкент шаҳрида хорижий инвесторлар, ҳукуматлар, халқаро молия институтлари ва глобал бизнес етакчиларини бирлаштирган Марказий Осиёнинг асосий инвестиция майдони - бешинчи Тошкент халқаро инвестиция форуми (TIIF-2026) ўтказилади, деб хабар бермоқда “Дунё” АА мухбири.

Ўзбекистон Инвестициялар, саноат ва савдо вазирлиги (ИССВ) маълумотига кўра, мазкур юбилей форуми 2025 йил июнь ойида ўтказилган IV TIIF натижаларининг мантиқий давоми бўлади. Ўтган форумда 97 давлатдан 8 000 дан ортиқ иштирокчи, жумладан 3 000 га яқин хорижий меҳмон қатнашди. Дастур доирасида 150 дан зиёд халқаро спикер иштирокида 36 та панель сессия ташкил этилди. Якунида умумий қиймати 30,5 миллиард АҚШ долларидан ортиқ бўлган инвестиция битимлари ва савдо шартномалари имзоланди.

Форум глобал молия институтлари томонидан билдирилаётган юқори даражадаги ишончни яна бир бор тасдиқлади.

Европа тикланиш ва тараққиёт банки (ЭБРД) президенти Одил Рено-Бассо шундай таъкидлади:“Европа тикланиш ва тараққиёт банкининг ТИИФ каби платформаларда иштироки Марказий Осиёнинг узоқ муддатли салоҳиятига бўлган ишончимизни ва ўзбек ҳамкорлар билан биргаликда барқарор ривожланиш лойиҳаларини қўллаб-қувватлашга тайёр эканимизни англатади”.

“Linde” компанияси раҳбари Штеффен Рихтер эса инвестиция муҳитидаги ижобий ўзгаришларни қайд этди:“Биз Ўзбекистонда тўғридан-тўғри хорижий инвестициялар учун шароитларни яхшилаш борасида сезиларли қадамларни кўряпмиз. Бу стратегик тармоқларда узоқ муддатли ҳамкорликни мустаҳкамлаш учун мустаҳкам замин яратади”.

Халқаро инвесторлар эътибори, аввало, саноат ривожи ва энергетика соҳасига қаратилди.

Форум доирасида сўзга чиққан “Knauf” бошқарув раиси Николаус Кнауф шундай деди:“Биз Ўзбекистонни Марказий Осиёдаги муҳим ишлаб чиқариш майдони сифатида кўрамиз. Ислоҳотларнинг изчиллиги ва инвесторлар учун очиқлик узоқ муддатли саноат фаолияти учун ишончли асос яратмоқда”.

Ўз навбатида, “Mangold Consulting” компанияси раиси Клаус Манголд ҳам мамлакатнинг саноат салоҳиятини алоҳида таъкидлади:“Марказий Осиёда ишлаб чиқаришни ривожлантиришга бу қадар қатъий интилаётган бошқа давлат йўқ”.

“Al Jazeera Media Network” бош директори Мостефа Суаг эса қуйидагича фикр билдирди: “Биз Ўзбекистонда жиддий трансформацион жараёнларни кузатяпмиз. Форум мамлакатнинг глобал мулоқотга очиқлигини ва халқаро ҳамжамият билан фаол ҳамкорликка тайёрлигини намойиш этади”.

Пленар сессиялар билан бир қаторда, форум доирасида 100 дан ортиқ маҳаллий ишлаб чиқарувчилар иштирокида йирик саноат кўргазмаси, шунингдек, юзлаб B2B ва B2G учрашувлар ташкил этилди. TIIF музокаралар реал лойиҳаларга, стратегик ниятлар эса аниқ инвестиция битимларига айланадиган самарали платформа сифатида ўзини тўлиқ намоён этди.

TIIF-2026 эришилган натижаларни мустаҳкамлаш ва инвестиция мулоқотини янги босқичга олиб чиқишни мақсад қилган. Иштирокчилар географиясини кенгайтириш, тармоқ йўналишларини чуқурлаштириш ҳамда амалий натижадорликни янада кучайтириш юбилей дастурининг асосий йўналишлари бўлади.

Бугунги кунда Тошкент халқаро инвестиция форуми оддий йиллик тадбир эмас. У халқаро капитал ишончининг кўрсаткичи, Ўзбекистоннинг глобал қиймат занжирларига интеграциялашув воситаси ҳамда Марказий Осиё билан жаҳон бозорлари ўртасида узоқ муддатли шерикликни шакллантирувчи стратегик майдондир.

2026 йил июнь ойида ўтказиладиган юбилей форуми ушбу ижобий динамиканинг мантиқий чўққисига айланади ва Ўзбекистоннинг минтақадаги энг фаол ҳамда истиқболли инвестиция марказларидан бири сифатидаги мавқеини яна бир бор тасдиқлайди.