ДОҲА, 12 декабрь. /“Дунё” AA/. Ўзбекистонлик мутахассислар Доҳа фан ва технологиялар университетида муҳандислик йўналиши бўйича малака оширмоқда, деб хабар бермоқда “Дунё” АА мухбири.

Ўқув курсининг тантанали очилиш маросимда университет ректори доктор Салим Ан-Нуаймий, Ўзбекистон элчиси Ашраф Ходжаев ҳамда Прогрессив ислоҳотлар маркази директори Миршоҳид Асланов иштирок этиб, икки давлат ўртасидаги илмий-амалий ҳамкорлик шиддат билан ривожланаётгани ва бир қатор қўшма ўқув дастурлари йўлга қўйилаётгани ҳақида тўхталиб ўтди.

10 ойлик мазкур ўқув дастури Ўзбекистон Республикаси элчихонаси, Наманган вилояти ҳокимлиги, Прогрессив ислоҳотлар маркази ва Доҳа фан ва технологиялар университети ҳамкорлигида амалга оширилмоқда. Лойиҳа қатарлик шериклар томонидан ажратилган грант маблағлари ҳисобидан молиялаштирилган.

Дарслар университетнинг Касб-ҳунар кўникмалари марказида олиб борилмоқда. Ўзбекистонлик мутахассислар пайвандлаш, сантехника, электр ишлари ва умумий муҳандислик йўналишларида замонавий услублар асосида билим ва амалий кўникмаларини мустаҳкамлайдилар.

Курсларни муваффақиятли якунлаган касб усталари Наманган вилоятида ташкил этилаётган “Ўзбекистон–Қатар касбий кўникмалар маркази”да машғулотлар ўтиши режалаштирилган. Янги марказ битирувчилари халқаро даражада тан олинадиган сертификатларга эга бўлиб, АҚШ, Европа, Яқин Шарқ ва бошқа мамлакатларда меҳнат қилиш имкониятига эга бўлади.