ПАРИЖ, 5 март. /“Дунё” АА/. Ўзбекистоннинг Франциядаги элчихонасида мамлакатимизда сайёҳлик соҳасида амалга оширилаётган ислоҳотларга бағишланган тадбир бўлиб ўтди, деб хабар қилмоқда “Дунё” АА мухбири.

Мазкур тадбир Самарқандда фаолият юритувчи “Explorator”, “Voyages Rive Gauche” ва “Karavan Travel” сайёҳлик компаниялари билан ҳамкорликда ташкил этилди. Унда Франция кенг жамоатчилиги, ОАВ вакиллари, Ўзбекистонга саёҳат қилишни режалаштираётган сайёҳлар иштирок этди.

Тадбир давомида иштирокчилар мамлакатимизнинг бой маданий мероси, меҳмонхона ва туризм инфратузилмасини ривожлантириш борасидаги замонавий лойиҳалар, экотуризм имкониятлари билан яқиндан танишди.

Цивилизациялар чорраҳаси ва қадимий Буюк ипак йўлида жойлашган Ўзбекистон кўп асрлик бой мерос ва келажакка интилишни ўзида мужассам этгани таъкидланди. ЮНЕСКОнинг Бутунжаҳон мероси рўйхатига киритилган афсонавий шаҳарлар ­– Самарқанд, Бухоро, Хива, тарихий обидалар ва ноёб музейлар ҳақида алоҳида тўхталиб ўтилди.

Дипломатларимиз миллий анъаналар, меҳмондўстлик қадриятлари, ҳунармандчилик, тоғлардан чўлларгача бўлган хилма-хил табиий ландшафтлар, экотуризм йўналишларида турли маълумотлар берди.

Қадимий виночилик анъаналарига эга ўзига хос гастрономия Ўзбекистонни Франциядан келган сайёҳлар учун энг жозибадор йўналишлардан бирига айлантиради. Буни юртимизга ташриф буюрган франциялик туристлар сонининг 2025 йилда қарийб 30 минг кишига етганидан ҳам англаш мумкин.

Француз ёзувчиси Дидье Лабушнинг “Ўзбекистон Ипак йўлининг юрагида” китоби ҳақида ҳам сўз юритилди. Китоб муаллифи Ўзбекистонга амалга оширган саёҳати ва қўлланмани тайёрлаш жараёни хусусида тўхталиб ўтди:

- Ўзбекистоннинг сайёҳлик салоҳиятини кенг жамоатчилик ва бўлажак саёҳатчиларга тақдим этишдан мамнунман. Бу диёр ҳақида яна янги китоб чиқариш тараддудидаман. Ушбу қўлланма ёзувчи Серхио Котсси ҳамда фотограф Эрве Инисан билан Ўзбекистонга қилган саёҳатимизга асосланиб тайёрланади.

Тадбирда “Explorator” сайёҳлик компанияси президенти Эрве Трибо-Ласпер ҳам сўз юритди:

- 1971 йилда ташкил этилган компаниямиз Ўзбекистон билан самарали ҳамкорлик қилиб келмоқда. Мамлакатингизнинг ажойиб маданий мероси ва буюк цивилизациясидан доим ҳайратланганман. Шу маънода, Ўзбекистон ва Франция ўртасида сайёҳлик йўналишларини ривожлантиришга фаол ҳаракат қилиб келамиз. Умид қиламанки, бундай ташаббуслар келгусида икки давлат ўртасида туризм соҳасидаги алоқаларни кенгайтиришда муҳим аҳамият касб этади.