ЛЮБЛЯНА, 19 июль. /“Дунё” АА/. Ўзбекистон элчиси Ойбек Шахавдинов Словения ташқи ва Европа ишлари вазири Тоне Кайзер билан учрашув ўтказди, деб хабар қилмоқда “Дунё” АА мухбири.

Музокаралар чоғида Ўзбекистон – Словения муносабатларининг бугунги ҳолати ва уларни янада ривожлантириш истиқболлари, олий даражада эришилган келишувларни амалга ошириш, шунингдек, сиёсий мулоқот, савдо-иқтисодий ва инвестициявий ҳамкорликни кенгайтириш масалалари муҳокама қилинди.

Томонлар икки мамлакатнинг соҳавий идоралари ўртасидаги амалий ҳамкорликни мустаҳкамлаш, қўшма лойиҳаларни илгари суриш ҳамда бўлажак икки томонлама тадбирларга тайёргарлик кўриш юзасидан фикр алмашди.

Учрашув якунида Ўзбекистон – Словения ҳамкорлигини янада чуқурлаштиришга ўзаро қизиқиш тасдиқланиб, эришилган келишувларни амалий рўёбга чиқариш мақсадида фаол ишчи мулоқотларни давом эттириш бўйича келишувга эришилди.