ТОШКЕНТ, 21 июнь. /"Дунё" АА/. Ўзбекистон ташқи ишлар вазири Бахтиёр Саидов Истанбул шаҳрида бўлиб ўтган Ислом ҳамкорлик ташкилоти (ИҲТ) Ташқи ишлар вазирлари кенгашининг 51-сессиясида иштироки доирасида Озарбайжон ташқи ишлар вазири Жейҳун Байрамов билан учрашди, деб хабар қилмоқда "Дунё" АА мухбири.

"Озарбайжон ташқи ишлар вазири Жейҳун Байрамов жаноблари билан учрашишдан мамнунмиз, – деб ёзди Ўзбекистон ТИВ раҳбари ўзининг telegram-каналида. – Ўзбекистон ва Озарбайжон ўртасидаги стратегик шериклик ва иттифоқчилик муносабатларини янада мустаҳкамлашга қаратилган икки томонлама кун тартибининг долзарб масалаларини муҳокама қилдик. Савдо, транспорт-логистика, энергетика ҳамда маданий-гуманитар соҳалардаги ҳамкорликни чуқурлаштиришга алоҳида эътибор қаратдик.

Икки мамлакат Раҳбарлари ўртасида олий даражада эришилган барча келишувларнинг тўлиқ ва ўз вақтида амалга оширилиши кун тартибимиздаги устувор масаладир".