ТОШКЕНТ, 23 апрель. /"Дунё" АА/. Бугун Самарқанд шаҳрида Ўзбекистон ташқи ишлар вазири Бахтиёр Саидов ва Россия ташқи ишлар вазири Сергей Лавров бошчилигидаги икки мамлакат делегацияларининг музокаралари бошланди, деб хабар қилмоқда "Дунё" АА мухбири.

"Ўзбекистон Республикаси ташқи ишлар вазири ва Россия Федерацияси ташқи ишлар вазири ўртасидаги музокаралар дўстона ва конструктив руҳда бошланди, – деб ёзди Ўзбекистон ТИВ раҳбарининг матбуот котиби Ахрор Бурхонов ўзининг telegram каналида. – Томонлар сиёсий, савдо-иқтисодий, маданий-гуманитар ҳамкорликнинг ҳозирги ҳолати ва истиқболларини муҳокама қилмоқда. Шунингдек, минтақавий ва халқаро масалалар юзасидан фикр алмашилмоқда.

Музокаралар давомида икки томонлама стратегик шерикликни янада мустаҳкамлашга, хусусан, қўшма лойиҳаларни амалга ошириш, қатор соҳаларда ҳамкорликни кенгайтиришга алоҳида эътибор қаратилиши кутилмоқда".

Эслатиб ўтамиз, Россия ташқи ишлар вазири Сергей Лавров бошчилигидаги делегация кеча Самарқандга келган эди.

"Дунё" АА олган сурат