O‘Sh, 12-dekabr. /“Dunyo” AA/. Qirg‘izistonning nufuzli “O‘sh sadasi” gazetasida O‘zbekistonning madaniy yutuqlari hamda uning yaxshi qo‘shnichilik siyosatiga bag‘ishlangan turkum maqolalar chop etildi, deb xabar bermoqda “Dunyo” AA muxbiri.

Xususan, “Andijon 2026-yilda turkiy dunyoning madaniyat poytaxti deb eʼlon qilindi” sarlavhali maqolada ushbu maqomning mintaqa uchun ahamiyati, rejalashtirilgan madaniy tadbirlar va ularning mamlakatlar o‘rtasidagi hamkorlikni qanday mustahkamlashiga oid maʼlumotlar bayon etilgan.

Materialda taʼkidlanishicha, Andijonda umumiy madaniy merosni ommalashtirishga qaratilgan qator festivallar, konferensiyalar va ijodiy uchrashuvlar o‘tkazilishi kutilmoqda.

Shuningdek, “O‘zbek–qirg‘iz do‘stligi va adabiy hamkorlik” nomli maqola o‘quvchilarni ikki mamlakat yozuvchilari va ijodiy uyushmalarining qo‘shma loyihalari, delegatsiyalar almashinuvi hamda adabiyot va sanʼat sohasidagi yangi tashabbuslar haqida xabardor qiladi.

Qayd etilishicha, bunday aloqalar madaniyatlararo muloqotni rivojlantirishga, yaxshi qo‘shnichilikni mustahkamlashga va umumiy gumanitar qadriyatlarni shakllantirishga hissa qo‘shadi.