DUSHANBE, 11-sentabr. /"Dunyo" AA/. Tojikistonning ommabop "Avesta" axborot agentligi "O'zbekiston tashqi siyosatining muhim yo'nalishi fuqarolarning huquq va manfaatlarini himoya qilishdan iborat" sarlavhali maqolani e'lon qildi, deb xabar qilmoqda "Dunyo" AA muxbiri.

"O'zbekistonning tashqi siyosiy faoliyati ilg'or demokratik davlatlar qatoriga qo'shilish maqsadida mamlakat suvereniteti va mustaqilligini mustahkamlash, respublikaning xalqaro hamjamiyatdagi ta'sirini kengaytirishga qaratilgan", – deb ta'kidlangan maqolada.

Manbada, shuningdek, O'zbekiston tashqi siyosiy faoliyatning birdek muhim jihati xorijdagi vatandoshlar bilan aloqalarini mustahkamlash bo'lib, bu respublikaning xalqaro munosabatlar sohasida ko'p qirrali va hamkorlikka asoslangan o'zaro strategik yo'nalishini aks ettirishi qayd etilgan.

Xususan, O'zbekiston Konstitutsiyasining 23-moddasida mamlakat fuqarolarini uning hududida ham, undan tashqarida ham himoya qilish va homiylik qilish kafolatlangan. Davlat xalqaro huquq normalariga muvofiq xorijda istiqomat qilayotgan vatandoshlar bilan aloqalarni saqlash va rivojlantirish haqida g'amxo'rlik qiladi.

"O'zbekiston Prezidentining 2023-yil 11 sentabrdagi farmoni bilan "O'zbekiston – 2030" strategiyasi tasdiqlandi. Ushbu strategiyaning 94-maqsadida xorijda istiqomat qilayotgan vatandoshlarni qo'llab-quvvatlash va ular bilan doimiy muloqot tizimini joriy etish ko'zda tutilgan", – qayd etadi Tojikiston OAV.

Muallif yozganidek, O'zbekiston tashqi siyosati xorijdagi fuqarolarni qo'llab-quvvatlashni kuchaytirish, davlat xizmatlari sifati va ulardan foydalanish imkoniyatlarini oshirish, qayerdaligidan qat'iy nazar, O'zbekiston fuqarolarining huquq va manfaatlarini himoya qilish istagini ifodalaydi.