ВАРШАВА, 12 март. /“Дунё” АА/. Ўзбекистон элчихонаси томонидан фуқаролар билан ўтказилган навбатдаги консуллик қабули давомида Самарқанд вилоятида туғилган фуқаро Р.М билан мулоқот ўтказилди, деб хабар қилмоқда “Дунё” АА мухбири.

Суҳбат давомида ватандошимиз 2023 йил апрель ойида Польша Республикасига ишчи визаси асосида вақтинчалик меҳнат фаолиятини амалга ошириш мақсадида келганини маълум қилди.

Ҳозирга қадар у оғир касалликка чалинган бўлиб, Польшадаги тиббий муассасалардан бирида даволанган.

Шу муносабат билан ҳамюртимиз Ватанга қайтиш ҳамда Ўзбекистонда даволанишини ташкил этишда амалий ёрдам кўрсатишни сўраб мурожаат қилган.

Фуқаронинг мурожаатини инобатга олган ҳолда, Ўзбекистон Миграция агентлиги билан ҳамкорликда амалий чоралар кўрилди. Хусусан, фуқаронинг Ватанга қайтиши учун авиачипта харид қилиниб, учишгача бўлган даврда вақтинчалик яшаш жойи билан таъминланди.

11 март куни фуқаро Р.М. Варшава-Тошкент рейси билан ватанига жўнаб кетган.