НЬЮ-ЙОРК, 8 февраль. /“Дунё” АА/. Ўзбекистоннинг Нью-Йорк шаҳридаги Бош консулхонаси кўмагида 2025 йилда ўзбекистонлик ватандош Фаррух Ниязимбетов томонидан ташкил этилган Халқаро Турон федерацияси бугун ўз тараққиётининг янги босқичига кўтарилмоқда, деб хабар қилмоқда “Дунё” АА мухбири.

Бугунги кунда International Turon Federation – Халқаро Турон федерацияси фаолиятни кенгайтириш ва ўзбек миллий яккакурашни жаҳон спорт майдонидаги мавқеини тобора мустаҳкамламоқда.

Ўтган давр мобайнида федерация томонидан зарур ташкилий база шакллантирилди. Бу эса миллий спорт тузилмалари билан ўзаро ҳамкорликнинг барқарор моделини яратиш ва иштирок этиш географиясини амалда кенгайтиришга киришиш имконини берди.

Ҳозирги кунда Халқаро Турон федерацияси таркибига Шимолий ва Жанубий Америка, Европа ва Осиё мамлакатларининг миллий ассоциациялари киради. Турон АҚШ, Канада, Мексика, Коста-Рика, Буюк Британия, Нидерландия, Туркия ва Японияда ривожланган. Янги Зеландия ва Мисрда миллий тузилмалар яратиш устида иш олиб борилмоқда.

Лотин Америкаси мамлакатларида Турон яккакурашини ривожлантириш алоҳида фаолият йўналиши бўлди. Боливияда миллий федерация давлат спорт органлари билан ҳамкорлик қилади. Бу ушбу яккакураш турининг расмий мақоми ва белгиланган спорт стандартларига мувофиқлигини тасдиқлайди.

Европада ушбу яккакураш турини ривожлантириш бўйича бошқарув органи вазифасини бажарувчи British Turon Association ташкилотининг ташкил этилиши муҳим қадамлардан бири бўлди.

Турон фаол халқаро кенгайишига қарамай, ўзининг тарихий ва маънавий ватани сифатида Ўзбекистон билан мустаҳкам алоқани сақлаб қолмоқда. Унинг ўзбек миллий анъаналарига асосланган фалсафаси, қадриятлари ва ахлоқий тамойиллари федерациянинг халқаро ва миллий тузилмалари орқали изчил тарғиб қилинмоқда.