ИСЛОМОБОД, 19 апрель. /«Дунё» АА/. Ўзбекистон элчиси Алишер Тўхтаев Покистоннинг етакчи фармацевтика компанияси ижрочи директори Шахаб Кохар билан видеоконференция шаклида музокаралар ўтказди, деб хабар бермоқда «Дунё» АА мухбири.

Покистон томонига фармацевтика тармоғини модернизация қилишга қаратилган жорий ислоҳотлар ҳамда республикада хорижий инвесторлар учун яратилган шарт-шароитлар ҳақида маълумот берилди. Хусусан, давлат томонидан қўллаб-қувватлаш механизмлари, солиқ ва божхона имтиёзлари, шунингдек, ихтисослашган эркин иқтисодий зоналардаги фаолиятнинг афзалликлари кўриб чиқилди.

Покистон компания ижрочи директори Ўзбекистон бозорини ўзлаштириш ва Марказий Осиё минтақасидаги иштирокини кенгайтиришга катта қизиқиш билдиришини тасдиқлади. Унинг таъкидлашича, дунёнинг 20 дан ортиқ мамлакатида фаолият юритаётган компания асосий эътиборни женериклар ишлаб чиқариш ва офтальмология йўналишини ривожлантиришга қаратган. Компания раҳбари республикадаги инвестиция муҳитининг барқарорлиги узоқ муддатли режалаштириш учун асосий омил эканини қайд этди.

Компаниянинг Ўзбекистон бозорига кириш стратегияси босқичма-босқич ёндашувни назарда тутади. Дастлабки босқичда тайёр дори воситаларини етказиб бериш ва рўйхатдан ўтказишни йўлга қўйиш режалаштирилган. Кейинчалик компания мамлакат ҳудудида ишлаб чиқаришни маҳаллийлаштириш ва қўшма қувватларни яратиш имкониятларини чуқур ўрганади, бу эса икки томонлама алоқаларни мустаҳкамлашга хизмат қилади.

Учрашув иштирокчилари, шунингдек, ҳамкорликнинг техник жиҳатларини, жумладан, сифат назорати, маҳсулотларни сертификатлаштириш жараёнлари ва транспорт-логистика йўналишларини оптималлаштириш масалаларини муҳокама қилдилар. Билдирилган ташаббусларни Ўзбекистоннинг тегишли вазирлик ва идоралари экспертларини жалб қилган ҳолда ишлаб чиқиш учун қўшимча маслаҳатлашувлар ўтказиш бўйича келишувга эришилди.

Музокаралар якунида ушбу режаларнинг амалга оширилиши Ўзбекистон ва Покистон ўртасидаги фармацевтика кооперациясини сифат жиҳатидан янги босқичга олиб чиқишда муҳим қадам бўлиши таъкидланди.