ВАШИНГТОН, 13 сентябрь. /“Дунё” АА/. АҚШ Конгресси аъзоси, Ўзбекистон бўйича Кокус ҳамраиси Трент Келли “Дунё” ахборот агентлиги орқали мустақиллигимизнинг 35 йиллиги муносабати билан Ўзбекистон халқига ўзининг самимий табрик ва эзгу тилакларини йўллади:

– Мамлакатингиз мустақиллигининг 35 йиллиги муносабати билан Ўзбекистон ва АҚШ ўртасидаги мустаҳкам ва юксалиб бораётган муносабатларни алоҳида таъкидламоқчиман.

Президент Шавкат Мирзиёев раҳбарлигида Ўзбекистонда иқтисодий ва ижтимоий ислоҳотлар тизимли равишда амалга оширилмоқда. Шу билан бирга, АҚШ ҳамда дунёдаги бошқа ҳамкорлар билан алоқалар тобора мустаҳкамланмоқда.

Президент Мирзиёевнинг Ўзбекистон тараққиётини таъминлаш ва унинг Марказий Осиёдаги етакчи давлат сифатидаги ролини кучайтириш борасидаги саъй-ҳаракатларини юксак қадрлайман.

1992 йилда дипломатик алоқалар ўрнатилганидан сўнг АҚШ ва Ўзбекистон минтақавий хавфсизлик, иқтисодий ривожланиш, савдо ва барқарорлик соҳаларидаги умумий манфаатларга асосланган муҳим ҳамкорликни йўлга қўйди.

Бугунги кунда АҚШ ва Ўзбекистон стратегик шериклик доирасида ҳамкорликни мустаҳкамлашда давом этмоқда. Мамлакатларимиз минтақавий хавфсизлик, терроризмга қарши кураш, савдо ва сармоя, стратегик муҳим минераллар каби соҳаларда ўзаро ҳамкорлик қилмоқда.

Ўзбекистоннинг Марказий Осиёдаги стратегик жойлашуви ва етакчилиги уни муҳим ҳамкорга айлантирмоқда. АҚШ бутун минтақада барқарорликни таъминлаш ва иқтисодий алоқаларни мустаҳкамлашга кўмаклашишга интилмоқда.

Ўзбекистон минтақавий ҳамкорлик, иқтисодий имкониятлар ва хавфсизликни илгари суриш мақсадида АҚШ ва Марказий Осиёнинг бешта давлатини бирлаштирган “C5+1” дипломатик платформаси доирасида ҳам муҳим ўрин тутади. Бу саъй-ҳаракатлар мамлакатларимиз ўртасидаги мустаҳкам муносабатларнинг аҳамияти доимий эканини намоён этади.

Мен Ўзбекистоннинг дўсти эканимдан фахрланаман ва ўзбек халқини мустақилликнинг 35 йиллиги билан қутлайман.

АҚШ ва Ўзбекистон ўртасидаги дўстлик ва ҳамкорлик янада ривожланишини интизорлик билан кутаман.