АНҚАРА, 23 май. /"Дунё"АА/. Туркия эксперт доиралари вакиллари "Дунё" АА учун интервьюларида Ўзбекистон Президенти Шавкат Мирзиёевнинг 19-21 май кунлари Венгрияга буюрган расмий ташрифи якунлари ва Туркий давлатлар ташкилоти норасмий саммитидаги иштироки ҳақидаги фикрларини билдирди:

Мехмет Сейфеттин Эрол, Анқара инқироз ва сиёсий тадқиқотлар маркази – "ANKASAM" директори:

– Ўзбекистон Президентининг Будапешт шаҳрида бўлиб ўтган Туркий давлатлар ташкилотининг норасмий саммитидаги иштироки нафақат туркий дунё, балки бутун Евроосиё минтақавий муносабатлар тизими учун муҳим воқеа бўлди. Унинг саммитдаги асосий нутқи шунчаки сиёсий баёнот эмас, балки келгуси йиллар учун аниқ векторни белгилаб берувчи концептуал ҳужжатдир.

Ўзбекистон Президенти Шавкат Мирзиёев туркий бирликнинг асосий устунлари - транспорт ва логистика, энергетика алоқаси, ёшлар ва гуманитар ҳамкорлик, шунингдек, инновацион шериклик соҳаларини белгилаб берди. Бундай ёндашув нафақат иштирокчи мамлакатлар манфаатларини уйғунлаштириш, балки туркий маконни глобал жараёнларга интеграция қилиш имконини беради. Транскаспий халқаро транспорт йўналишига алоҳида эътибор қаратилаётгани, шунингдек, ягона таълим ва илмий макон яратиш муҳимлигини алоҳида таъкидлаш жоиз.

Ўзбекистон ТДТ доирасида нафақат фаол иштирокчи, балки интеграциянинг интеллектуал "драйвер" бўлишга ҳам тайёр эканини яна бир бор намойиш этди.

Инқироз сиёсати ва геостратегия бўйича мутахассис сифатида мен ушбу нутқни прагматизм, узоқни кўра билиш ҳамда маданий ва цивилизациявий ёндашувни ўзида яққол ўзида мужассам этган масъулиятли етакчиликнинг манифестидир, деб қабул қиламан. Бу глобал ўзгаришлар ва геосиёсий тебранишлар даврида зарур бўлган дипломатия услубидир.