ВЕНА, 3 май. /“Дунё” АА/. БМТнинг Гиёҳванд моддалар ва жиноятчилик бўйича бошқармаси (UNODC) расмий веб-сайтида жорий йил 20-21 апрель кунлари Ўзбекистонда бўлиб ўтган “Жамоат саломатлиги ва хавфсизлигини таъминлаш мақсадида трансмиллий наркотаҳдидларга қарши курашиш” мавзусидаги биринчи Самарқанд халқаро форуми якунларига бағишланган мақола эълон қилинди, деб хабар бермоқда “Дунё” АА мухбири.

Материалда Ўзбекистоннинг форум ташкилотчиси ва минтақавий ҳамкорликнинг асосий ҳаракатлантирувчи кучларидан бири сифатидаги ўрнига алоҳида урғу берилган. UNODC қайд этишича, кенг кўламли кўп томонлама иштирок ҳамда ёшларнинг фаол жалб этилгани мамлакатнинг БМТ тизими доирасидаги кўп томонлилик ва конструктив ҳамкорлик тамойилларига содиқлигидан далолат беради.

Форум якунларига кўра, далилларга асосланган профилактика, ҳуқуқни муҳофаза қилиш соҳасидаги ҳамкорлик ва мавжуд таҳдидлар тўғрисида ахборот алмашинувига доир ягона минтақавий ёндашувни мустаҳкамлаган Самарқанд декларацияси қабул қилинган.

Бундан ташқари, мақолада UNODC Оператив бошқармаси директори Бо Матиасеннинг сўзлари келтирилган бўлиб, у Ўзбекистон ҳукуматига форумни ташкил этгани учун миннатдорлик билдириб, минтақадаги гиёҳванд моддалар бозорларининг ўзгаришига жавобан шериклик алоқаларини кучайтириш муҳимлигини таъкидлаган.

“Хулоса ўрнида шуни таъкидлаш жоизки, Самарқанд декларацияси минтақавий мулоқотдан амалий ҳамкорликка ўтишда муҳим босқич бўлиб, Марказий Осиёни гиёҳванд моддалар ноқонуний айланишининг ҳалокатли таъсиридан холи, ҳозирги ва келажак авлодларнинг хавфсизлиги, саломатлиги ҳамда барқарор ривожланиши таъминланадиган маконга айлантиришга хизмат қилади”, дея якунлайди нашр.